រដ្ឋបាលស្រុកស្រីសន្ធរថា គ្មានការជីកកកាយយកអាចម៍ ដីទៀតទេ ខណៈដែលការពិតគឺឈ្មួញនៅតែបន្តជីក

ខេត្តកំពង់ចាម÷ រហូតមកដល់រសៀលថ្ងៃទី១៩ ខែមេសា ឆ្នាំ២០២៤ នេះសកម្មភាពជីកកកាយយកអាចម៍ដីលក់ នៅតំបន់វាលព្រៃលិចទឹកអូរតាម៉ៅក្រោយភូមិ ក្នុងឃុំព្រែករំដេង ស្រុកស្រីសន្ធរ ខេត្តកំពង់ចាម នៅតែបន្តកើតមានជាធម្មតា ស្របពេលដែលរដ្ឋបាលស្រុក បានចេញសេចក្តីប្រកាសព័ត៌មានថា មិនមានសកម្មភាពជីកកកាយយកអាចម៍ដីទៀតទេ។ ដូច្នេះសេចក្តីបំភ្លឺ នៅលើក្រដាស១សន្លឹកដែលចារអក្សរ ៤,៥ បន្ទាត់របស់រដ្ឋបាលស្រុកស្រីសន្ធរនោះ គ្រាន់តែជាការជួយបិទបាំងអំពើទុច្ចរឹតរបស់ពួកឈ្មួញតែប៉ុណ្ណោះ។

ប្រភពដកស្រង់សម្ដីថៅកែគ្រឿងចក្រ ដែលកំពុងជីកយកអាចម៍ដីនៅខាងក្រោយភូមិព្រែកឪជ្រឹង ឃុំព្រែក រំដេង ស្រុកស្រីសន្ធរឲ្យដឹងថា ការជីកយកអាចម៍ដីនោះគឺទទួលបានការអនុញ្ញាតច្បាប់ពីរដ្ឋបាលស្រុកស្រីសន្ធរ ហើយម្យ៉ាងទៀតគឺគេជីក នៅក្នុងដីស្របច្បាប់របស់ខ្លួនដែលមានប្លង់រឹងត្រឹមត្រូវ។យ៉ាងណាក៏ដោយម្ចាស់គ្រឿង ចក្រនេះមិនបង្ហាញលិខិតអនុញ្ញាត ឬច្បាប់ទម្លាប់ដែលអះអាងថា សាលាស្រុកចេញឲ្យនោះ ដល់អ្នកកាសែតបានឃើញទេ។ មិនតែប៉ុណ្ណោះប្រសាសន៍របស់ថៅកែគ្រឿងចក្រ ហាក់ដូចជាមានអាថ៌កំបាំង ច្រើនជាពិសេសពាក់ព័ន្ធនឹងការយកគ្រឿងចក្របិទផ្លូវមិនឲ្យអ្នកកាសែតបានធ្វើដំណើរ។

ប្រភពព័ត៌មានឲ្យដឹងថា ក្រុមឈ្មួញគ្រឿងចក្រកកាយអាចម៍ដីកំពុងធ្វើសកម្មភាពកាយគាស់ដីព្រៃលិចទឹក នៅខាងក្រោយ ភូមិព្រែកឪជ្រឹង ឃុំព្រែករំដេង ស្រុកស្រីសន្ធរ ខេត្តកំពង់ចាម។ អ្នកភូមិនៅឃុំព្រែករំដេងបានដឹងអំពីសកម្មភាព នៃការជីកកកាយយកអាចម៍ដីលក់ប៉ុន្តែមិនដឹងថា តើពួកអ្នកជីកយកអាចម៍ដីទាំង នោះមានច្បាប់អនុញ្ញាតដែរឬក៏យ៉ាងណានោះទេ។ បើពួកគេជីកកកាយ យកអាចម៍ដីដោយស្របច្បាប់មែន ហេតុម្ដេច ចាំបាច់យកគ្រឿងចក្របាំងបិទផ្លូវហើយមិនឲ្យអ្នកកាសែតបានទៅឃើញរណ្ដៅដីដែលពួកគេជីក។

រណ្ដៅដីត្រូវគេប៉ាន់ស្មានថា មានជម្រៅជាង២ម៉ែត្រ និងមានរថយន្តប្រហែល១០គ្រឿងធ្វើសកម្មភាពដឹកជញ្ជូនអាចម៍ដីបន្តកន្ទុយគ្នា យកទៅចាក់បំពេញទីផ្សេងៗនៅ ក្នុងមូលដ្ឋានក្បែរៗនោះ។ ពលរដ្ឋប្រាប់ថា គ្រឿងចក្រ ដែលធ្វើសកម្មភាពដឹកជញ្ជូន និងជីកកកាយទាំងនោះមើលទៅហាក់ដូចជាមានការប្រយ័ត្នប្រយែងចំពោះអ្នក ចំណូលថ្មី,ជនប្លែកមុខ ជាពិសេសក្រុមអ្នកកាសែតត្រូវបានរារាំងឬហាមឃាត់មិនឲ្យចូលទៅដល់តំបន់នោះទេ។ យ៉ាងណាក៏ដោយរហូតដល់រសៀល ថ្ងៃទី១៩ ខែ មេសាឆ្នាំ២០២៤នេះគ្រឿងចក្រមួយចំនួនត្រូវបានជម្លៀសចេញដោយស្ងៀមស្ងាត់។

លោកស៊ីម គង់ អភិបាលស្រុកស្រីសន្ធរមិនលើកទូរសព្ទនោះទេ។ យ៉ាងណាក៏ដោយ នៅក្នុងសេចក្តីបំភ្លឺរបស់រដ្ឋបាលស្រុកស្រីសន្ធរបានក៏ដឹងថា ពិតជាមានការជីក កកាយយកដីលក់នោះមែន ប៉ុន្តែបន្ទាប់ពីបានឃើញកាសែតផ្សព្វផ្សាយព្រោងព្រាត ក៏រដ្ឋបាលស្រុកបានដឹងហើយក៏ឲ្យបញ្ឈប់សកម្មភាពខុសច្បាប់នោះទៅ។

ពលរដ្ឋយល់ឃើញថា វាជារឿងលំបាកដែលអាជ្ញាធរស្រុកស្រីសន្ធរ មិនដឹងអំពី អ្វីដែលកំពុងកើត មានឡើងនៅក្នុងមូលដ្ឋានរបស់ខ្លួន ជាពិសេសពាក់ព័ន្ធនឹងបញ្ហាផលប្រយោជន៍ ដូចនេះ។ ទោះយ៉ាងណាក៏ដោយ គេរំពឹងថាអាជ្ញាធរជំនាញខេត្តកំពង់ចាមនឹងពិនិត្យមើលករណីដែលកំពុងកើតមាននៅក្នុងទីតាំងខាងលើនេះ ដើម្បីឲ្យប្រជាពលរដ្ឋបានអស់កង្វល់ផង។ ពីព្រោះមើល ទៅវាជារឿងផលប្រយោជន៍របស់អាជ្ញាធរស្រុក និងពួកឈ្មួញឃុបឃិតគ្នា៕

ដោយ:សុិន ខ្វាន់ឆា
ទំនាក់ទំនងព័ត៌មាន:010840732/061881299